Friday, November 30, 2007
Gatas
I.
Ang pag-ibig at libog
ay gatas na de-lata,
malabnaw at malapot,
evaporada o condensada.

II.
Gatas din na de-lata
ang paghanap ng kapareha
,
Sa pagpili ng kasama?
Carnation o Alaska.
 
tinipa ni Bote. noong 12:30 PM | Permalink | 0 comments
Friday, November 23, 2007
Si Macho Gwapito, ang Superstar, at ako.

[Unang tula sa Palihan I, MPs 110. Labingdalawang pantig, tugmang isahan]

Kwento ng Tatay ko, kamukha raw niya
si Rico J. Puno ‘nung s’ya’y binata pa.
Sa buhok, sa bigote, pati sa porma,
nabihag si Nanay, sila’y nag-asawa.

Sa pagsasama nila ako’y nabuo,
katangian nila’y sa akin naghalo.
Sa sinapupunan ako ay naglaro,
sumipa-sipa pa, lumangoy sa dugo.

Napaisip sila kung ano ang ngalan
ng batang lumalaki na nga sa tiyan.
Hanggang pumasok kay Nanay, sa isipan
niya, tatak nga ng pagiging Noranian
.

Si Nora Aunor na kaniyang idolo,
doon gustong itulad ang pangalan ko.
Nora nga ang tumapos sa pagtatalo
sa kung ano ang tawag sa batang bago
.

Subalit nagulat na nga lang ang lahat,
pagkat lalaki ang biglang sumambulat.
Balak na pangalan ay hindi na lapat,
kaya sa papel, Noah ang isinulat.

 
tinipa ni Bote. noong 2:49 PM | Permalink | 0 comments